Sarrera
Zer da Passion for Knowledge?
Passion for Knowledge (P4K) zientzia funtsezko kultur jarduera gisa sustatzea xede duen jaialdia da. Zientzia, kultur-ekintza ez ezik, gizartearen eta ekonomiaren aurrerabideari, eta gizartearen askatasunari laguntzen dion diziplina dela ulertuta beti ere. Jaialdiak komunitate zientifikoa, hainbat diziplinatako figura ezagunak eta baita herritarrak ere oro har biltzen ditu, guztion artean ezagutza zientifikoa partekatzeko eta zientziaren eta bere baloreen zabalkundean guztion parte hartzea sustatzeko helbururarekin.
2016ko edizioa P4K jaialdi-sortetan hirugarrena izango da, eta Donostia International Physics Center (DIPC) ikerketa zentroak antolaturiko zientziaren dibulgazio eta komunikazioko bosgarren ekitaldi handia. Passion for Knowledge 2016 batez ere Donostian burutuko da, irailaren 27tik urriaren 1era arte, 2016ko urte honetan Donostia Europako Kultur Hiriburutza duela aprobetxatuz, eta DSS2016EUren egitarau ofizialean bildurik.
Egokiera baliatuko dugu, berriz ere, zientzia giza-kulturaren parte dela aldarrikatzeko, gizakiaren kultur-lan kolektibo garrantzitsuena seguru asko. Passion for Knowledge, Kulturarekiko Pasioa da.
P4K 2016 jaialdian, zer espero?
Donostian izango dira Passion for Knowledge 2016 jaialdiari lotutako jardueren gehiengoa. Ehun urtetik gora dituen Victoria Eugenia Antzokia izango da egoitza nagusia, aukeratua hain zuzen ere zientziaren kultur-izaera azpimarratzeko.
Hala eta guztiz ere, harago egin nahi du P4K 2016 jaialdiak, mugak gaindituz. Horrela, beste jarduera batzuk ere antolatu dira Bilbon eta Bordelen (Frantzia), azken hau, Euskampus, Euskal Herriko Unibertsitateko (UPV/EHU) Nazioarteko Bikaintasun Campusaren esparruan.
Herritar guztiak, helduak zein gazteak, inplikatzeko moduko hainbat jarduera eskainiko dira. Oro har jendeari zuzendutako Hitzaldi Nagusi sorta nabarmendu behar dugu; zientziaren alor desberdinetatik ikasteko bidea izango dugu hainbat Nobel Saridunen eta mundu mailako adituen eskutik. Baina askoz ere gehiago eskaintzen du jaialdi honek: bigarren hezkuntzako ikasleen eta puntako zientzialarien arteko Topaketak, eskola zientifiko bat ikertzaile gazteei zuzendua, Naukas saioak, erakusketak, zuzeneko ikuskizunak, etab.
DIPC, Nor gara?
Donostia International Physics Center (DIPC) zientziaren abangoardiako ikerketa burutzen duen zentro berezi bat da eta, gainera, hasiera-hasieratik ezagutza zientifikoa gizarteari helarazteko kompromisoa ere hartu du bere gain, kultura zientifikoak gizartearen aurrerapenari eta askatasunari laguntzen diola sinetsita. DIPCk zientzialarientzat topaketa-guneak eskaintzen ditu, eta herritarrei zientzia hurbiltzeko ekimenak antolatzen ditu. Era horretan, DIPCren helburua ezagutzari begirako jakin-mina, interesa, lilura, gogo-berotasuna eta pasioa piztea da; batez ere, gazteen artean.
Ezagutu gaitzazu
http://dipc.ehu.eus